كفر العرب

فضلت ابص على الباب طول الفرح مستنياك.. بس انت مجتش.. انت سافرت وسبتني بجد.. سيبتني لوحدي اواجهه.
قلتلها انا كنت عيل وجبان يا حنان، كنت فاكر الرجولة اني اسمع كلام الناس واخاف من الفضيحة. دلوقتي فهمت، الرجولة اني احافظ على اللي بحبه حتى لو العالم كله وقف ضدي. انا سافرت عشان ابقى راجل استاهلك، وبنيت بيت فوق دارنا ليكي انتي وفريدة.. اديني فرصة تانية يا بنت عمي.. فرصة واحدة بس نبدأ من جديد.. ولو بعدها قلتي لا، عمري ما هوريكي وشي تاني وهسافر ومش هرجع.
سكتت كتير اوي. وبصت لفريدة اللي نايمة وبعدين بصتلي وقالتلي بصوت واطي
سيبني افكر يا رامز.

. اسبوع بس.
الاسبوع ده كان اطول اسبوع في حياتي. 7 ايام كل ثانية بسنة.
لحد ما جه يوم الجمعة بعد الصلاة. لقيت ابويا بيناديني. خرجت البلكونة لقيت عمي عبد الله جاي هو وحنان وفريدة وامي واقفة معاهم تحت. البلد كلها واقفة تتفرج من البلكونات.
عمي عبد الله بصلي وقالي بصوت عالي يا رامز يا ابن اخويا يا غالي.. انا جيت النهاردة اطلب منك السماح قدام الناس كلها.. انا غلطت في حقك انت وبنتي من 4 سنين لما جيت على بنتي عشان الفلوس.. والنهاردة جاي ارجع الامانة لمكانها.. لو لسه شاري بنت عمك حنان وبنتها فريدة، انا جاي اطلب ايدها ليك مرة تانية.
الدنيا كلها سكتت. كل العيون بقت عليا وعلى حنان.
بصيت لحنان لقيتها منزلة وشها في الارض ومكسوفة وبتفرك في ايدها زي ما كانت بتعمل وهي صغيرة لما تتكسف، وفريدة بتضحك وبتشد في جلابيتها وبتقولي قول اه يا عمو رامز.. هتبقى بابا بجد؟
نزلت من فوق جري. نزلت على ركبتي قدامهم كلهم في نص الشارع، قدام البلد اللي خفت من كلامها زمان، ومسكت ايد حنان وقلتلها
موافقة يا بنت عمي ترجعيلي وتبقي مراتي وام بنتي؟
حنان مقدرتش تمسك دموعها. عيطت بصوت عالي المرة دي مش من الوجع، من الفرحة، وقالت
موافقة يا رامز.. موافقة يا ابن عمي.. موافقة.
الزغاريط ملت البلد كلها يومها، بس المرة دي زغاريط بجد طالعة من القلب.
النهاردة فات على جوازنا انا وحنان 6 شهور. كتبت كتابي عليها وعملتلها فرح صغير على قدنا فوق السطح اللي كنت بقولها زمان هاخدك اعيشك فيه. وفريدة بقت تنام في حضني كل يوم وتقولي يا بابا رامز بجد مش هزار.
وانا قاعد دلوقتي بكتبلكم القصة دي وحنان نايمة جنبي على سريرنا وفريدة نايمة في حضني.
اتعلمت ان الحب مش كلام بيتقال وخلاص، الحب فعل. وان اللي بيحب بجد مبيسيبش حبيبته حتى لو كل الدنيا قالتله سيبها. وان الكبرياء حلو، بس لما بيزيد عن حده بيضيع مننا اغلى ناس بنحبها. وان بنت العم مش بس نسب، دي عرض وشرف وحب عمره ما بيموت.